வேடிக்கைத் திரட்டி
புதிதாக முளைத்திருக்கும் சில திரட்டிக்காரர்கள் காசிலேயே குறியாக இருக்கிறார்கள். வலைப்பதிவுகளைத் திரட்ட வலைப்பதிவர்களிடம் அனுமதி பெறுவதில் அவர்களுக்கு ஆர்வமில்லை.
tamil.sg என்ற திரட்டியில் என்ன வேடிக்கை என்றால், ஃபயர்ஃபாக்ஸில் tami.sgக்குச் சென்றால் இன்டர்நெட் எக்ஸ்ப்ளோரரைப் பயன்படுத்தச் சொல்கிறது. tamil.sg/thiratti என்ற பக்கத்தில் இருக்கும் திரட்டியில் ரைட்க்ளிக் செய்வதைத் தடுத்திருக்கிறார்கள். இந்தப் பக்கத்தில் விளம்பரங்களும் போட்டிருக்கிறார்கள்.
அதாவது நாம் எழுதுவதை அவர்கள் பக்கத்தில் போட்டுக்கொள்ள நம்மைக் கேட்கத் தேவையில்லையாம், ஆனால் அதன் மூலம் அவர்களுக்குக் காசு மட்டும் வர வேண்டுமாம். என் வலைப்பதிவை இவ்வினோதத் திரட்டியிலிருந்து நீக்கச் சொல்லி அந்த வலையகத்தின் ‘தொடர்பு’ பக்கத்தின் மூலம் ஒரு மின்னஞ்சல் அனுப்பியிருக்கிறேன்.
முப்பரிமாணச் சித்திரங்கள்
நல்ல ஐடியா. முதலில் மனித உருவச் சிற்பங்களை உருவாக்குகிறார், பிறகு அவரே வடிவமைத்த செட்களில் வைத்துப் புகைப்படம் எடுத்து ‘முப்பரிமாணச் சித்திர’ங்களைத் தயாரிக்கிறார்.
அரவியல்
“An erection is a blushing of the penis” என்று பாலியல் நிபுணர் ஹேவ்லக் எல்லிஸ் The Psychology of Sex என்ற புத்தகத்தில் எழுதியிருக்கிறார். ஆணுறுப்பைப் பாம்பாக உருவகிப்பது பழைய விஷயம். இந்த இரண்டின் காம்பினேஷனை 1974 மார்ச் ஆனந்த விகடன் அட்டைப்படத்தில் பார்த்தேன். படத்தை வரைந்தவர் வேறு யார், ஜெயராஜ்தான்.
இது மேட்டர் சைட் இல்லை
வலைப்பதிவு எழுதும்போது ‘கெட்ட வார்த்தை’களைப் பயன்படுத்துவதில் எனக்குப் பிரச்சினை இல்லை. ஆனால் கூகிளிலும் குருஜி.காமிலும் உடலுறுப்புகளின் பெயரைத் தேடி தினமும் இந்த வலைப்பதிவுக்கு வருகிறார்கள். இந்த கேஸ்களைத் தவிர்க்க உடலுறுப்பு சார்ந்த கெட்ட வார்த்தைகளைப் பயன்படுத்தக் கூடாது என்று தீர்மானம் மேற்கொள்ள வேண்டியிருக்கிறது.
செந்தில்கள்
என்னைப் போலவே பல செந்தில் நண்பர்களைக் கொண்ட என் நண்பர் ஒருவரிடம் கேட்டபோது, “செந்தில்களின் நம்பர்களை நான் மொபைல்-லில் பதிவு செய்வதில்லை. அவர்களுக்கென தனியாக நோட்டு போட்டு குறிப்புகளோடு எழுதி வைக்கிறேன்” என்றார்.
என்றெழுதுகிறார் புதிய வலைப்பதிவர் ஆரண்யன். எனக்கே மூன்று செந்தில்களைத் தெரியும். அதில் ஒருவர் பெயர் நினைவில்லை. ஓவர் டு நாளைக்கு மழை பெய்யும் (வலைப்பதிவுக்கு நல்ல பெயர்!).